Tesla kompaniyasi Cybercab robotaksilarini ommaviy ishlab chiqarishni boshladi
Ilon Mask rahbarligidagi Tesla kompaniyasi Cybercab deb nomlangan futuristik robotaksilarni ommaviy ravishda ishlab chiqarish jarayoniga start berdi. Bu haqda Zamin.uz xabar berdi. Mazkur elektromobil ilk bor 2024 yil jamoatchilikka ko'rsatilgan edi. Ushbu transport vositasi an'anaviy avtomobillardan butunlay farq qilishi bilan ajralib turadi.
Xususan, unda rul va tepkilar kabi odatiy boshqaruv elementlari mavjud emas, bu esa inson aralashuvisiz harakatlanadigan to'liq avtonom tizimni anglatadi. Mask tomonidan taqdim etilgan videotasvirlarda haydovchisiz mashina konveyerdan chiqib, mustaqil harakatlanayotganini ko'rish mumkin.
Ikki o'rinli va ikki eshikli sedan shaklidagi ushbu model minimalistik dizaynga ega. Unda orqa ko'rinish oynalari, eshik tutqichlari va hatto orqa oyna ham o'rnatilmagan.
Tashqi ko'rinishi Cybertruck uslubini eslatuvchi elektromobilning eshiklari "chayka qanoti" kabi yuqoriga ochiladi. Old qismda yaxlit panel va ingichka LED chiroqlar joy olgan.
Maskning so'zlariga ko'ra, Cybercab boshqa Tesla modellariga qaraganda arzonroq bo'ladi va uning narxi 30 000 dollardan oshmasligi kutilmoqda. Biroq loyihaning ommalashishi yo'lida ayrim to'siqlar saqlanib qolmoqda.
Hozircha AQShda bunday to'liq avtonom transport vositalaridan foydalanish uchun rasmiy ruxsat berilmagan. Shuningdek, avtonom haydash texnologiyasini yanada takomillashtirish talab etiladi.
Agarda huquqiy va texnik masalalar ijobiy hal etilsa, ushbu loyiha shahar transport tizimini sezilarli darajada o'zgartirishi mumkin.
