Rossiya parallel import ro'yxatidan yirik kompyuter brendlarini chiqardi

Rossiya Sanoat va savdo vazirligi parallel import ro'yxatidan bir qator xorijiy brendlar chiqarilishiga doir qaror yuzasidan bayonot berdi. Bu haqda Zamin.uz xabar berdi.

Idora mutaxassislarining ta'kidlashicha, mazkur o'zgarishlar mamlakat ichki bozorida kompyuter texnikalari va butlovchi qismlar tanqisligini keltirib chiqarmaydi. Ixbt.com nashri tarqatgan xabarga ko'ra, tegishli hujjat 2025 yil 26 noyabr kuni tasdiqlangan bo'lib, rasmiy kuchga kirish muddati 2026 yil 27 may etib belgilangan.

Yangi tartibga muvofiq, Acer, Asus, Fujitsu, HP, Hitachi, IBM, Intel, Kingston, Samsung va Toshiba kabi yirik brendlarning noutbuklari, serverlari hamda kompyuter qurilmalari parallel import mexanizmidan chiqariladi. Vazirlik ushbu cheklovlar chakana savdo tarmog'idagi mahsulotlar turiga salbiy ta'sir ko'rsatmasligini bildirdi.

Rasmiy tushuntirishda qayd etilishicha, ushbu qadamdan ko'zlangan asosiy maqsad mahalliy radioelektronika mahsulotlariga bo'lgan ehtiyojni rag'batlantirishdir. Shuningdek, mazkur chora Rossiya elektronika sanoati salohiyatini yuksaltirishga hamda mahalliy ishlab chiqaruvchilarning ichki bozordagi mavqeini mustahkamlashga xizmat qilishi kutilmoqda.

Hukumat vakillari bozorning texnologik ehtiyojlari mahalliy resurslar hisobidan qoplanishiga ishonch bildirdi.