Majburiy ijro byurosining Yashnobod tuman bo‘limi xodimlari tomonidan o‘tkazilgan majburiy ijro tadbirlari jarayonida fuqaro N.A.ga tegishli majburiyatlar yuzasidan tekshiruv o‘tkazildi. Bu haqda Zamin.uz xabar berdi.
Aniqlanishicha, mazkur fuqaro kommunal xizmatlar, soliq to‘lovlari hamda ma’muriy jarimalarni belgilangan muddatlarda to‘lamay kelgan va natijada sezilarli miqdorda qarzdorlik yuzaga kelgan. Ushbu holat yuzasidan huquqiy choralar ko‘rilib, masala sud tartibida ko‘rib chiqildi.
FIB Mirobod tumanlararo sudining 2025 yil 19 martdagi sud buyrug‘iga muvofiq, qarzdor fuqarodan issiqlik ta’minoti korxonasi foydasiga 21,1 million so‘mdan ortiq mablag‘ni undirish belgilandi. Ayni paytda byuro inspektorlari tomonidan mazkur sud hujjatini ijro etish va qarzdorlikni to‘liq qoplash bo‘yicha tegishli chora-tadbirlar amalga oshirilmoqda.
Qonun talablariga ko‘ra, fuqaro zimmasidagi moliyaviy majburiyatlarni o‘z vaqtida bajarishi shart. Aks holda, ijro hujjatida ko‘rsatilgan summa majburiy tartibda, shu jumladan, qarzdorning mol-mulki yoki bank hisob raqamlari orqali undirilishi ko‘zda tutilgan.
Ushbu jarayon byuro nazoratida davom etmoqda.
Izohlar
0