Marokash Artemis Oy dasturiga qo'shilgan navbatdagi davlat bo'ldi

Marokash Artemis kelishuviga qo'shildi

Marokash 29 aprel kuni Oyni o'zlashtirishga qaratilgan Artemis xalqaro kelishuvini imzoladi. Bu haqda Zamin.uz xabar berdi.

Ixbt.com nashrining xabar berishicha, hujjatni imzolash marosimi Rabot shahrida bo'lib o'tdi va unda mamlakat tashqi ishlar vaziri Nosir Burita ishtirok etdi. Marokash so'nggi o'n kun ichida ushbu tashabbusga qo'shilgan uchinchi davlatga aylandi.

AQSh davlat kotibi o'rinbosari Kristofer Landau kelishuvlar doirasining kengayishi koinotni mas'uliyat bilan tadqiq etishga bo'lgan xalqaro qiziqish ortayotganidan dalolat berishini ta'kidladi. Hozirgi vaqtda mazkur hujjatni imzolagan davlatlar soni 40 taga yetdi.

Marokashdan avval, 20 aprel kuni Latviya, 23 aprel kuni esa Iordaniya ushbu saflarga qo'shilgan edi. 2024 yil boshidan buyon jami beshta mamlakat mazkur xalqaro loyiha ishtirokchisiga aylandi.

Ekspertlarning fikricha, ishtirokchilar sonining ko'payishi aprel oyi boshida o'tkazilgan Artemis 2 missiyasi bilan bog'liq bo'lishi mumkin. NASA sobiq vakili Mayk Gold dastur rivojlangani sayin unga bo'lgan qiziqish yanada kuchayishini qayd etdi.

Artemis kelishuvlari mavjud xalqaro shartnomalar asosida koinotni xavfsiz o'zlashtirish tamoyillarini belgilab beradi. NASA ushbu hujjatni kelajakdagi Oy bazasini boshqarish va xalqaro hamkorlikni muvofiqlashtirishning asosiy poydevori sifatida ko'rmoqda.