Ijtimoiy tarmoqlarda o‘zbekistonlik fermerlar tomonidan qoramollar tanasiga zebranikiga o‘xshash oq-qora rangdagi chiziqlarni chizish jarayoni aks etgan videolar keng tarqalmoqda. Bu haqda Zamin.uz xabar berdi.
Mutaxassislarning fikricha, mazkur usul chorva mollarini turli xil chaquvchi hasharotlar hujumidan himoya qilishda samarali vosita bo‘lishi mumkin. Ushbu texnologiya dastlab Yaponiyada o‘tkazilgan ilmiy izlanishlar doirasida tajribadan o‘tkazilgan.
Xususan, 2019 yilda nufuzli PLOS ONE ilmiy jurnalida e’lon qilingan tadqiqot natijalari shuni ko‘rsatdiki, qoramollar tanasiga chizilgan oq-qora chiziqlar pashsha va boshqa zararkunandalarning hayvonlarga qo‘nishi hamda ularni bezovta qilish darajasini sezilarli darajada kamaytiradi. Ushbu vizual effekt hasharotlarning ko‘rish qobiliyatini chalg‘itib, ularning mo‘ljal olishiga to‘sqinlik qiladi.
Hozirgi kunda o‘zbek fermerlari ham chorvachilikda hosildorlikni oshirish va mollarni tashqi ta’sirlardan asrash maqsadida ushbu xorijiy tajribani o‘z xo‘jaliklarida qo‘llashga urinib ko‘rmoqdalar. Mazkur usul kimyoviy vositalardan foydalanmasdan, ekologik toza va tejamkor himoya mexanizmi sifatida alohida ahamiyat kasb etadi.
Izohlar
0