O'zbekistonda valyuta obligatsiyalarini chiqarish tartibi tasdiqlandi

Adliya vazirligi valyuta obligatsiyalarini chiqarish tartibini tasdiqladi

Adliya vazirligi kapital bozorida zamonaviy moliyaviy instrumentlarni joriy qilishga qaratilgan yangi tartibni davlat ro'yxatidan o'tkazdi. Bu haqda Zamin.uz xabar berdi.

Mazkur hujjat xorijiy valyutada ifodalangan obligatsiyalarni muomalaga chiqarish va joylashtirish qoidalarini belgilab beradi. Ushbu mexanizm "Tartibga solish qumdoni" maxsus huquqiy rejimi doirasida hayotga tatbiq etilmoqda.

Yangi qoidalarga ko'ra, valyuta obligatsiyalari nominal qiymati va daromadi chet el valyutasida belgilanadigan qimmatli qog'oz hisoblanadi. Bunday aktivlar egalari belgilangan muddat yakunida asosiy sarmoya va emissiya shartlarida ko'rsatilgan foizlarni olish huquqiga ega bo'ladi.

Mazkur moliyaviy instrumentni chiqarish huquqi faqat "Tartibga solish qumdoni" ishtirokchisi maqomiga ega bo'lgan O'zbekiston rezidentlariga beriladi. Bunda emitentlar auditorlik tashkiloti tomonidan tasdiqlangan ijobiy moliyaviy hisobotga ega bo'lishi majburiy etib belgilandi.

Bozor barqarorligini ta'minlash maqsadida bitta emitent uchun valyuta obligatsiyalarining umumiy hajmi 50 mln AQSh dollari ekvivalentidan oshmasligi bo'yicha cheklov o'rnatildi. Obligatsiyalar ta'minlangan yoki ta'minlanmagan shaklda chiqarilishi mumkin, biroq ta'minotsiz qog'ozlar hajmi kompaniyaning o'z kapitali miqdori bilan cheklanadi.

Ushbu jarayonlar, jumladan daromadlarni to'lash va qog'ozlarni so'ndirish ustidan nazorat Istiqbolli loyihalar milliy agentligi tomonidan yuritiladi. Mutaxassislar ushbu o'zgarishlar mamlakat kapital bozorini diversifikatsiya qilish va xorijiy investitsiyalar oqimini ko'paytirishga xizmat qilishini ta'kidlamoqda.