Trampning qizi ekanini da’vo qilayotgan ayol uchrashuv so‘ramoqda

Turkiyada istiqomat qiluvchi Nejla O‘zmen ismli ayol AQSH prezidenti Donald Tramp bilan bog‘liq navbatdagi bayonoti bilan jamoatchilik diqqat markaziga tushdi. Bu haqda Zamin.uz xabar berdi.

O‘zini AQSH rahbarining biologik qizi deb atab kelayotgan mazkur fuqaro bu safar rasmiy qadam tashlashga qaror qildi. U AQSHning Turkiyadagi elchixonasi orqali prezident bilan shaxsan uchrashish uchun rasmiy murojaat yo‘llaganini ma’lum qildi.

Ushbu harakatning sababi sifatida 7–8 iyul kunlari NATO sammiti doirasida Donald Trampning Turkiyaga rejalashtirilgan tashrifi ko‘rsatilmoqda. Nejla O‘zmen aynan shu diplomatik tadbir davomida Amerika yetakchisi bilan yuzma-yuz uchrashib, o‘z da’volari yuzasidan muloqot qilishni maqsad qilgan.

Hozircha AQSH elchixonasi yoki prezident ma’muriyati tomonidan ushbu murojaat yuzasidan biror bir rasmiy bayonot berilmadi. Vaziyat jamoatchilik va ommaviy axborot vositalari tomonidan kuzatilmoqda, biroq mazkur da’volarning qanchalik asosli ekanligi bo‘yicha hech qanday tasdiqlangan ma’lumotlar mavjud emas.