Forbes dunyo milliarderlarining 40-yubiley reytingini e'lon qildi
Forbes nashri dunyoning eng boy insonlari aks etgan navbatdagi reytingini taqdim etdi. Bu haqda Zamin.uz xabar berdi. Joriy yilda sayyoradagi milliarderlar soni o'tgan yilgi ko'rsatkichdan oshib, 3 428 nafarga yetdi. Global miqyosda eng badavlat kishilarning jami sarmoyasi 20,1 trillion dollar miqdorida baholanmoqda.
Mazkur ro'yxatda rossiyalik tadbirkorlarning mavqei va ular tomonidan o'rnatilgan yangi rekordlar alohida diqqat markazida bo'ldi. Metallurgiya va oltin qazib olish sanoati vakili Aleksey Mordashov Rossiya biznesi tarixida yangi sahifa ochdi.
Uning boyligi 37 mlrd dollarga yetib, mamlakat tarixida 30 mlrd dollarlik marrani zabt etgan ilk tadbirkorga aylandi. Bunday o'sishga Mordashovlar oilasiga tegishli Nord Gold kompaniyasi aksiyalarining qimmatlashishi sabab bo'lgan.
Dunyo bozorida oltin narxi 80 % ga oshishi natijasida mazkur aktiv qiymati tadbirkorning "Severstal"dagi ulushidan ikki baravar o'zib ketdi. Rossiyalik milliarderlar soni bir yil ichida 146 nafardan 155 nafarga ko'paydi.
Ularning umumiy boyligi 625,5 mlrd dollardan 696,5 mlrd dollargacha ko'tarildi. Mutaxassislar ushbu o'sishni rublning mustahkamlanishi va yirik korxonalar tomonidan to'langan dividendlar bilan izohlamoqda.
Xususan, 85 nafar tadbirkor o'z sarmoyasini sezilarli darajada ko'paytirishga muvaffaq bo'ldi. Shu bilan birga, reytingda jiddiy yo'qotishlar ham kuzatildi.
Dmitriy Kamenshik "Domodedovo aeroporti" musodara qilingach, milliarderlar safini tark etdi. Konstantin Strukov oltin qazib olish aktivlaridan, Denis Shtengelov esa "KDV" xoldingidan mahrum bo'lgani sababli ro'yxatdan chiqdi.
Arkadiy Voloj Rossiya fuqaroligidan voz kechgani bois rossiyalik milliarderlar qatorida qayd etilmadi. Oltin narxi ko'tarilishi ortidan Sulaymon Kerimov va uning oilasi 25,7 mlrd dollar sarmoya bilan kuchli beshlikdan joy oldi.
