Dunyo milliarderlari soni besh yilda 4 ming nafarga yetishi kutilmoqda
Jahon miqyosida yirik kapital to'plash jarayoni jadal sur'atlar bilan davom etmoqda. Bu haqda Zamin.uz xabar berdi. Xalqaro tahlillarga ko'ra, yaqin yillarda milliarderlar soni sezilarli darajada ko'payishi bashorat qilinmoqda. Hozirgi vaqtda dunyoda 3 mingdan ortiq milliarder istiqomat qilayotgan bo'lsa, keyingi besh yil ichida bu ko'rsatkich 25 % ga o'sib, 4 ming nafarga yaqinlashishi mumkin.
Shu bilan birga, kamida 30 mln dollar miqdoridagi aktivlarga ega multimillionerlar safi ham kengayib bormoqda. Ekspertlar xulosasiga ko'ra, mazkur o'sish sur'atlariga asosan texnologiya sohasi va sun'iy intellekt yo'nalishidagi yuqori daromadlar turtki bermoqda.
Zamonaviy imkoniyatlar biznesni kengaytirishni osonlashtirib, qisqa muddatda ulkan boylik orttirish uchun sharoit yaratdi. Tahlillar ayrim mintaqalarda, xususan, Yaqin Sharq va Yevropa davlatlarida milliarderlar soni bir necha barobar ortishini ko'rsatmoqda.
Biroq bu jarayon jamiyatdagi ijtimoiy tabaqalanishni yanada chuqurlashtirmoqda. Hisobotlarga ko'ra, sayyoramizning juda kam sonli vakillari dunyo aholisining katta qismiga nisbatan bir necha barobar ko'p boylikka egalik qiladi.
Shu sababli mutaxassislar o'ta boy qatlam uchun soliq siyosatini qayta ko'rib chiqish zarurligini ta'kidlamoqda. Yirik kapital egalarining nafaqat iqtisodiy, balki siyosiy ta'siri kuchayib borayotgani xavotirlarga sabab bo'lmoqda.
Hozirgi vaqtda eng boy insonlar reytingida Mask yetakchilik qilmoqda. Undan keyingi o'rinlarni Peyj va Bezos egallagan.
Kelajakda milliarderlar geografiyasi o'zgarishi va asosiy yetakchilik Osiyo mintaqasiga o'tishi kutilmoqda.
