Madridning "Real" klubi hujumchisi Vinisius Junior ijtimoiy tarmoqdagi shaxsiy sahifasida jamoaga tegishli barcha suratlar va ma’lumotlarni o‘chirib tashladi. Bu haqda Euro-football.ru xabar berdi.
Ushbu holat futbol olamida turli muhokamalarga sabab bo‘lmoqda. Qizig‘i shundaki, mazkur o‘zgarishlar "Real" rahbariyati bilan futbolchining amaldagi shartnomasini uzaytirish bo‘yicha ijobiy muzokaralar o‘tkazilgani haqidagi xabarlar fonida yuz berdi.
Eslatib o‘tamiz, tomonlar o‘rtasidagi hozirgi kelishuv 2027-yilning yoziga qadar mo‘ljallangan. Bu Vinisius Junior tomonidan amalga oshirilgan ilk shunday holat emas.
O‘tgan yili klublar o‘rtasidagi jahon chempionatidan so‘ng, muxlislar tomonidan bildirilgan tanqidlarga javoban futbolchi xuddi shunday yo‘l tutgan va sahifasidagi klub bilan bog‘liq barcha ma’lumotlarni olib tashlagan edi. Hozircha na futbolchining o‘zi, na uning vakillari va na Madrid klubi rasmiy bayonot bilan chiqdi.
Vaziyat yuzasidan aniq izohlar berilmagan. Mutaxassislar ushbu qadam shunchaki hissiyotlar ta’sirida qilinganmi yoki futbolchi va klub o‘rtasida yashirin kelishmovchiliklar bormi, degan savolga javob izlamoqda.
Voqealar rivojini kuzatishda davom etamiz.
Izohlar
0