O‘zbekiston Mudofaa vazirligi qoshidagi merganlar terma jamoasi Janubiy Koreyada tashkil etilgan III Xalqaro merganlar musobaqasida navbatdagi g‘alabani qo‘lga kiritdi. Bu haqda Zamin.uz xabar berdi.
O‘zbekistonlik harbiylar ushbu nufuzli turnirda ketma-ket ikkinchi yil birinchi o‘rinni egallab, o‘zlarining yuqori tayyorgarlik darajasini namoyish etishdi. Jamoa bu yilgi musobaqada o‘tgan yilgi natijalarini sezilarli darajada yaxshilashga muvaffaq bo‘ldi va xalqaro maydonda o‘z mavqeyini yanada mustahkamladi.
Musobaqa joriy yilning 3–10 sentyabr kunlari Janubiy Koreyaning Kyonggi provinsiyasida bo‘lib o‘tdi. Unda dunyoning turli mamlakatlaridan tashrif buyurgan mohir merganlar o‘zaro bellashdilar.
O‘zbekistonlik harbiylarning mazkur muvaffaqiyati mamlakat mudofaa salohiyatini oshirish hamda harbiy xizmatchilarning kasbiy mahoratini xalqaro standartlarga mos ravishda rivojlantirish borasida olib borilayotgan tizimli ishlarning amaliy samarasi sifatida baholanmoqda. Mazkur g‘alaba O‘zbekiston harbiy jamoasining jahon miqyosidagi raqobatbardoshligini yana bir bor tasdiqladi.
Izohlar
0