Maks Eberl Bavariya klubidagi lavozimini tark etishi mumkin

Myunxenning "Bavariya" klubida muvaffaqiyatli mavsumga qaramay, rahbariyatdagi ziddiyatlar va ichki kelishmovchiliklar saqlanib qolmoqda. Bu haqda Euro-football.ru xabar berdi.

Nufuzli Kicker nashrining xabar berishicha, klub ichidagi vaziyat so‘nggi bir necha oy davomida keskinlashgan va bu holat jamoa boshqaruvidagi birdamlikka putur yetkazmoqda. Xabarda ta’kidlanishicha, sport direktori Maks Eberl o‘z o‘rinbosari bilan munosabatlarni buzib olgan.

Bundan tashqari, klubning yuqori martabali vakillari tomonidan unga nisbatan bosim kuchaymoqda. Rahbariyat Eberlning qarorlar qabul qilish tezligidan norozi.

Shuningdek, asosiy transfer masalalari bo‘yicha amalga oshirilayotgan qadamlar kuzatuv kengashi bilan yetarli darajada muvofiqlashtirilmayotgani tanqid qilinmoqda. Vaziyat shunchalik jiddiy tus olganki, klubning faxriy prezidenti Uli Xyones sport direktorining kelajagiga shubha bilan qaramoqda.

U Eberlning lavozimida qolish ehtimolini 60 foiz deb baholagan. Klubning kelgusi boshqaruv tuzilmasi va Maks Eberlning "Bavariya"dagi faoliyati bilan bog‘liq yakuniy qaror avgust oyida bo‘lib o‘tadigan kuzatuv kengashi yig‘ilishida qabul qilinishi kutilmoqda.

Hozirda klub muxlislari va futbol ekspertlari rahbariyatdagi ushbu noaniqlik jamoaning yangi mavsumdagi natijalariga qanday ta’sir ko‘rsatishini diqqat bilan kuzatishmoqda.