Karim Adeyemi 22 million yevro evaziga Barselona safiga o‘tdi

Germaniya terma jamoasi hujumchisi Karim Adeyemi rasman "Barselona" futbolchisiga aylandi. Bu haqda Euro-football.ru xabar berdi.

Tomonlar o‘rtasidagi transfer kelishuvi 22 million yevroni tashkil etdi. Avvalroq Dortmundning "Borussiya" klubi o‘z hujumchisini 40 million yevrodan kamiga qo‘yib yubormasligi haqida xabarlar tarqalgan edi.

Yakuniy kelishuvga ko‘ra, kataloniyaliklar dastlabki bosqichda 22 million yevro to‘laydi. Shuningdek, turli bonuslar, jumladan, jamoaning turnirlardagi muvaffaqiyatli ishtiroki evaziga nemis klubi yana qo‘shimcha 7 million yevro ishlab olish imkoniyatiga ega.

Taniqli jurnalist Fabritsio Romanoning ma’lum qilishicha, Karim Adeyemi va "Barselona" o‘rtasida besh yillik shartnoma imzolangan. Eslatib o‘tamiz, Adeyemi 2021-yildan beri Dortmund "Borussiya"si sharafini himoya qilib kelayotgan edi.

Ushbu davr mobaynida u 146 ta uchrashuvda maydonga tushib, raqiblar darvozasiga 36 ta gol urgan va 25 ta golli uzatmani amalga oshirgan. Hozirda 24 yoshli futbolchining bozor qiymati 40 million yevroga baholanmoqda.

Matbuotda tarqalgan xabarlarga ko‘ra, ushbu transferning asosiy sabablaridan biri futbolchining yaqin insoni Dortmund shahrida yashashni istamagani bo‘lgan. Endilikda iqtidorli hujumchi faoliyatini Ispaniya chempionatida davom ettiradi.