Afssonaviy futbolchi va murabbiy Frans Bekkenbauersulolasi vakili Luka Bekkenbauer oilaviy an’anani davom ettirmoqda. Bu haqda Euro-football.ru xabar berdi.
Eslatib o‘tamiz, 2015-yilda uning otasi Shtefan Bekkenbauer, 2024-yilda esa bobosi – jahon futboli afsonasi Frans Bekkenbauer vafot etgandi. Yaqinlarining yo‘qotishiga qaramay, Luka futbol olamida o‘z o‘rnini topishga intilmoqda.
Yaqinda Luka Bekkenbauer Myunxenning "Bavariya" klubi qoshidagi 13 yoshgacha bo‘lgan bolalar jamoasiga murabbiy etib tayinlandi. Mutaxassis ushbu lavozimda ish boshlaganiga ko‘p bo‘lmagan bo‘lsa-da, allaqachon ijobiy natijalarni qayd etmoqda.
Uning futbolchilik faoliyati esa kutilganidek yorqin kechmagan. Luka o‘z vaqtida "Bavariya", "Shalke" va "Gannover" klublarining yoshlar jamoalarida tarbiyalangan.
Shuningdek, u "MTV Myunxen" safida to‘p surgan, biroq keyinchalik erkin agent maqomini olib, professional faoliyatini yakunlashga qaror qilgan edi. Hozirgi kunda Luka Bekkenbauer qo‘l ostidagi "Bavariya" yoshlar jamoasi turnir jadvalida muvaffaqiyatli ishtirok etmoqda.
Jamoa ayni damda ikkinchi o‘rinda bormoqda va peshqadam "Nyurnberg" bilan bir xil ochkoga ega. Yosh murabbiy o‘zining murabbiylik faoliyatida bobosining boy tajribasi va futbol falsafasiga tayanib, yangi avlod futbolchilarini tarbiyalashda davom etyapti.
Uning mazkur sohadagi muvaffaqiyatlari futbol muxlislari va mutaxassislar tomonidan katta qiziqish bilan kuzatilmoqda.
Izohlar
0