Ispaniya chempionatining yakunlanishiga besh tur qolganida, "Barselona" turnir jadvalida "Real Madrid"dan 11 ochkoga o'zib ketgan holda peshqadamlik qilmoqda. Bu haqda Euro-football.ru xabar berdi.
Kataloniya klubi muddatidan avval chempionlikni qo'lga kiritishga juda yaqin turibdi. Buning uchun jamoa navbatdagi turda "Osasuna"ni mag'lub etishi, Madrid klubi esa "Espanyol" bilan o'yinda ochko yo'qotishi lozim.
Agar ushbu ssenariy amalga oshmasa, "Barselona" 10-may kuni bo'lib o'tadigan "el-klasiko" bahsidan so'ng chempionlikni rasmiylashtirishi mumkin. Catalunya Radio xabariga ko'ra, har ikki holatda ham La Liga chempionlik kubogi "Barselona"ga aynan "Real Madrid" bilan uchrashuv yakunlangach topshiriladi.
Shunga qaramay, kataloniyaliklar uchun muddatidan avval xotirjamlikka berilishga hali erta. "Real Madrid" nazariy jihatdan kurashni davom ettirish imkoniyatiga ega, biroq buning uchun madridliklar qolgan barcha o'yinlarda maksimal natija ko'rsatishlari talab etiladi.
Hozircha asosiy e'tibor 10-maydagi prinsipial to'qnashuvga qaratilgan bo'lib, unda Ispaniya taxtining yangi egasi nomi rasman e'lon qilinishi kutilmoqda.
