Amazon OpenAI modellarini o'z platformasiga integratsiya qildi
Amazon Web Services (AWS) kompaniyasi OpenAI modellari, jumladan, yangi agent xizmatlarini o'z ichiga olgan qator takliflarni taqdim etdi. Bu haqda Zamin.uz xabar berdi. Techcrunch.com nashrining xabar berishicha, ushbu qadam OpenAI o'zining asosiy investori Microsoft bilan eksklyuziv hamkorlik huquqlarini bekor qilganidan so'ng amalga oshirildi. Mazkur o'zgarish natijasida OpenAI uchun AWS platformasi bilan ishlashdagi mavjud to'siqlar olib tashlandi.
Amazon rahbari Endi Jassi ushbu kelishuvni yuqori baholadi. Avvalroq tomonlar o'rtasida 50 mlrd dollargacha bo'lgan yirik shartnoma imzolangani ma'lum qilingan edi.
AWS tarkibidagi Bedrock xizmati endilikda OpenAI'ning eng so'nggi modellari, Codex kod yozish tizimi va sun'iy intellekt agentlarini yaratishga mo'ljallangan mahsulotlarni taqdim etadi. Xususan, Bedrock Managed Agents deb nomlangan yangi xizmat aynan OpenAI'ning mantiqiy fikrlash modellaridan foydalanish uchun ishlab chiqilgan.
Amazon o'zining rasmiy blogida ushbu loyiha AWS va OpenAI o'rtasidagi keng ko'lamli hamkorlikning boshlanishi ekanini ta'kidladi. So'nggi vaqtlarda Microsoft va OpenAI munosabatlarida sovuqlashish kuzatilmoqda.
Hozirda OpenAI AWS va Oracle bilan aloqalarni kuchaytirayotgan bo'lsa, Microsoft o'z navbatida Anthropic kompaniyasi bilan hamkorlikni kengaytirmoqda.
