O'zbekistonda turistik dala hovlilarning yagona elektron reyestri yaratiladi
O'zbekistonda turizm sohasini tizimlashtirish maqsadida barcha joylashtirish maskanlari, xususan, turistik dala hovlilarning yagona elektron bazasi shakllantiriladi. Bu haqda Zamin.uz xabar berdi. Mazkur platforma orqali mamlakatdagi barcha dam olish maskanlari to'liq xatlovdan o'tkazilishi va ularning faoliyati doimiy monitoring qilinishi belgilangan. Yangi tartibga muvofiq, turistik dala hovlilarda hordiq chiqaruvchi mijozlardan maxsus turistik yig'im undirilmaydi.
Shu bilan birga, ushbu turdagi maskanlarda xizmat ko'rsatish istagida bo'lgan tadbirkorlar uchun alohida litsenziya yoki ruxsatnoma olish talabi bekor qilingan. Bu choralardan ko'zlangan maqsad sohada tadbirkorlik faoliyatini yengillashtirish va turizm salohiyatini oshirishdan iborat.
Shuningdek, sohada jamoatchilik nazoratini kuchaytirish maqsadida yangi rag'batlantirish tizimi yo'lga qo'yiladi. Unga ko'ra, noqonuniy faoliyat yuritayotgan yoki rasmiy ro'yxatdan o'tmagan ijara ob'ektlari haqida xabar bergan fuqarolarga mukofot puli to'lanadi.
Mukofot mablag'lari qoidabuzarlardan undirilgan jarimalarning bir qismi hisobidan shakllantirilishi ko'zda tutilgan. Mazkur mexanizm turizm xizmatlari bozorida shaffoflikni ta'minlashga xizmat qiladi.
