Toshkent viloyatining sanoat salohiyati yuqori bo‘lgan Olmaliq shahrida ekologik vaziyatni yaxshilash va aholi uchun sifatli dam olish maskanlarini barpo etish borasida muhim tashabbus ilgari surildi. Bu haqda Zamin.uz xabar berdi.
Shahar hokimi Barhayot Meliyev hamda Xitoyning yetakchi korxonalaridan biri hisoblangan Haocheng Industry Group vakillari o‘rtasida o‘tkazilgan muzokaralar natijasida yangi loyihani amalga oshirish bo‘yicha kelishuvga erishildi. Ushbu hamkorlik doirasida shaharning Kamalak mahallasi hududida zamonaviy infratuzilmaga ega bo‘lgan istirohat bog‘i va yashil hududlarni tashkil etish rejalashtirilgan.
Mazkur loyihaning asosiy maqsadi shahar markazidagi ekologik muhitni sog‘lomlashtirish, sanoat korxonalari ta’sirini kamaytirish hamda hudud aholisi uchun munosib hordiq chiqarish sharoitlarini yaratishdan iborat. Tomonlar loyihani belgilangan muddatlarda va yuqori sifat standartlari asosida yakunlash yuzasidan o‘zaro fikr almashdilar.
Ushbu tashabbus Olmaliq shahrining ijtimoiy-iqtisodiy rivojlanishiga hamda hududning investitsion jozibadorligini oshirishga xizmat qilishi kutilmoqda. Kelgusida mazkur istirohat maskani nafaqat mahalliy aholi, balki shahar mehmonlari uchun ham asosiy madaniy-maishiy markazlardan biriga aylanishi ko‘zda tutilgan.
Izohlar
0