Toshkent shahrida jamoat transporti tizimidagi tirbandliklarni bartaraf etish va yo‘lovchilar uchun qulay sharoitlar yaratish maqsadida muhim o‘zgarishlar joriy etilmoqda. Bu haqda Zamin.uz xabar berdi.
Xalq deputatlari Toshkent shahar Kengashining 2026 yil 30 oktyabrdagi qaroriga muvofiq, poytaxtdagi transport infratuzilmasini yaxshilash bo‘yicha aniq chora-tadbirlar belgilanib, ularni bosqichma-bosqich amalga oshirish ko‘zda tutilgan. Ushbu hujjatga ko‘ra, metro poyezdlarining sig‘imini oshirish maqsadida tarkiblar besh vagonli shaklga o‘tkaziladi.
Bu choralar tig‘iz soatlarda yo‘lovchilar oqimini tartibga solish va vagonlardagi gavjumlikni kamaytirishga xizmat qiladi. Shuningdek, avtobus yo‘nalishlari bo‘yicha ham yangi tartib joriy etiladi.
Xususan, yo‘lovchilar eng ko‘p foydalanadigan yo‘nalishlarda avtobuslar qatnovi soni ko‘paytiriladi. Shahar transport boshqarmasi tomonidan kechki vaqtlardagi transport xizmatlarini yaxshilash maqsadida ayrim yo‘nalishlardagi reyslar vaqtini uzaytirish masalasi ham ko‘rib chiqilmoqda.
Mazkur yangilanishlar shahar aholisiga jamoat transportidan foydalanishda qulaylik yaratish hamda transport tizimi samaradorligini oshirishni maqsad qilgan.
Izohlar
0