O‘zbekiston Respublikasi Prezidenti Shavkat Mirziyoyev amaliy tashrif bilan Turkiya Respublikasiga yetib keldi. Bu haqda Zamin.uz xabar berdi.
Anqara shahrida davlat rahbarini ushbu mamlakatda tahsil olayotgan va mehnat faoliyatini olib borayotgan o‘zbekistonlik vatandoshlarimiz katta hurmat va samimiyat bilan kutib olishdi. Tashrif dasturidan o‘rin olgan rasmiy tadbirlar doirasida Prezident xorijda istiqomat qilayotgan yurtdoshlarimiz bilan uchrashuv o‘tkazdi.
Mazkur muloqot chog‘ida davlat rahbari ularning yashash sharoitlari, ta’lim tizimidagi yutuqlari hamda kundalik faoliyatlari bilan yaqindan tanishdi. Suhbat davomida vatandoshlarning muammolari, ularni qiynayotgan masalalar va takliflar tinglandi.
O‘z navbatida, Prezident yoshlarning xorijiy davlatlardagi o‘rni, ularning bilim olishga bo‘lgan intilishi va mamlakatimiz rivojiga qo‘shayotgan hissasi haqida alohida to‘xtalib o‘tdi. Ushbu uchrashuv davlatimizning xorijdagi fuqarolar bilan doimiy aloqada bo‘lish, ularni har tomonlama qo‘llab-quvvatlash hamda o‘zaro hamkorlikni yanada mustahkamlash siyosatining uzviy davomi sifatida namoyon bo‘ldi.
Ochiq va samimiy ruhda o‘tgan suhbat vatandoshlarimizda katta taassurot qoldirdi.
Izohlar
0