Yangiyo‘lda homilador ayol turmush o‘rtog‘i tomonidan pichoqlandi

Toshkent viloyatining Yangiyo‘l shahrida oilaviy kelishmovchilik oqibatida jiddiy jinoyat sodir etildi. Bu haqda Zamin.uz xabar berdi.

Er o‘z turmush o‘rtog‘iga pichoq bilan tan jarohati yetkazdi. Hozirgi vaqtda jabrlanuvchi shifoxonaga yotqizilgan bo‘lib, unga zarur tibbiy yordam ko‘rsatilmoqda.

Rasmiy ma’lumotlarga ko‘ra, mazkur hodisa joriy yilning 30 may kuni soat 17:00 atrofida yuz bergan. Jabrlanuvchining so‘zlariga tayanib aytish mumkinki, er-xotin joriy yilning 5 aprel kuni qonuniy nikohdan o‘tgan.

Ayol ayni damda homiladorlikning ikkinchi oyida bo‘lib, bir yarim oylik egizak farzand kutayotganini ma’lum qilgan. Shuningdek, jabrlanuvchi turmush o‘rtog‘i tomonidan ilgari ham unga nisbatan tazyiqlar o‘tkazilgani va jismoniy kuch ishlatilganini ta’kidlab o‘tgan.

Ayni paytda huquq-tartibot organlari tomonidan voqea tafsilotlari o‘rganilmoqda va surishtiruv harakatlari olib borilmoqda. Holat yuzasidan tegishli huquqiy baho berilishi kutilmoqda.