Neuralink neyrointerfeysi falajlangan bemorlarga robot-qo'llarni fikr kuchi bilan boshqarish imkonini berdi
Ilon Maskka tegishli Neuralink kompaniyasi o'z ishlanmalari imkoniyatlarini namoyish etdi. Bu haqda Zamin.uz xabar berdi. Tajriba davomida falajlangan insonlar robotlashtirilgan qo'llarni faqat fikr kuchi yordamida boshqarishga muvaffaq bo'ldi. Mazkur texnologik yutuq haqida Ixbt.com nashri ma'lumot berdi.
Neuralink tizimining asosi miyaga o'rnatiladigan maxsus chipga tayanadi. Ushbu qurilma neyron signallarini o'qib, ularni raqamli buyruqlarga aylantiradi.
Foydalanuvchi muayyan harakatni tasavvur qilishi bilan tizim tashqi vositalarsiz yoki jismoniy harakatlarsiz topshiriqni bajaradi. Mutaxassislarning ta'kidlashicha, ushbu bosqich texnologiyaning nazariy konsepsiyadan amaliy natijaga o'tganini tasdiqlaydi.
2016-yilda AQShda asos solingan Neuralink neyrotexnologiya kompaniyasi inson miyasi va elektron qurilmalar o'rtasida bevosita aloqa o'rnatishni maqsad qilgan. Hozirgacha ushbu chiplar yordamida kompyuter kursorini boshqarish, videoo'yinlar o'ynash va matnli xabarlar yozish imkoniyatlari sinovdan o'tkazildi.
Shuningdek, kompaniya ko'rish qobiliyatini yo'qotgan shaxslar uchun Neuralink Blindsight loyihasi ustida ham ish olib bormoqda. Bunday interfeyslar og'ir jarohat olgan bemorlarning mustaqil harakatlanish imkoniyatlarini tiklashga xizmat qiladi.
