Bosch va Ecovacs oshxona mebeliga yashirinuvchi robot-changyutgichni taqdim etdi
Bosch hamda Ecovacs kompaniyalari zamonaviy oshxonalar uchun mo'ljallangan yangi robot-changyutgich modelini namoyish qildi. Bu haqda Zamin.uz xabar berdi. Ixbt.com nashrining yozishicha, qurilmaning o'ziga xos jihati uning maxsus dok-stansiya yordamida oshxona javonlari ichiga to'liq yashirinishidir. Ushbu texnologiya evaziga tozalash stansiyasi mebel konstruksiyasining uzviy qismiga aylanadi.
Yangi qurilmani to'g'ridan-to'g'ri suv ta'minoti va kanalizatsiya tizimiga ulash mumkin. Bu foydalanuvchini suv idishlarini qo'lda to'ldirish yoki ifloslangan suvni to'kish majburiyatidan ozod etadi.
Tozalash jarayoni yakunlangach, stansiya mikrofibra salfetkalarni 75 daraja issiq havoda dezinfeksiya qiladi va 45 darajali havo oqimi bilan quritadi. Robotning balandligi 8,4 sm bo'lib, u past mebellar ostiga ham bemalol kira oladi.
Qurilmaning so'rish quvvati 20 000 Pa ga teng etib belgilangan. Bu ko'rsatkich Bosch kompaniyasining avvalgi modellariga nisbatan sezilarli darajada yuqori hisoblanadi.
Sun'iy intellekt tizimi bilan jihozlangan robot yo'lidagi buyumlarni aniqlash va 2 sm gacha bo'lgan to'siqlardan o'tish imkoniyatiga ega. Chang yig'ish uchun 2 litr hajmli maxsus qopdan foydalaniladi.
Yangi model 2024 yilning bahor oylarida savdoga chiqarilishi rejalashtirilgan. Hozircha qurilmaning aniq narxi e'lon qilinmadi, biroq mutaxassislar uning qiymati yuqori bo'lishini taxmin qilmoqda.
