Birlashgan Millatlar Tashkilotining ta’lim, fan va madaniyat masalalari bo‘yicha tashkiloti – YUNЕSKO dunyo miqyosida jurnalistlarning xavfsizlik holati yuzasidan navbatdagi tahliliy hisobotini taqdim etdi. Bu haqda Zamin.uz xabar berdi.
Mazkur hujjatda jurnalistlar faoliyatiga tahdid solayotgan xavfli tendensiyalar va kasbiy burchini bajarish chog‘ida halok bo‘layotgan axborot vositalari xodimlari sonining ortib borayotgani chuqur tashvish bilan qayd etilgan. Statistika shuni ko‘rsatmoqdaki, so‘nggi ikki yil ichida OAV vakillariga qaratilgan xavf-xatarlar kuchaygan.
Xususan, 2024–2025 yillar davomida global miqyosda jami 189 nafar jurnalist o‘z vazifasini ado etish jarayonida hayotdan ko‘z yumgan. Ushbu ko‘rsatkichlar matbuot erkinligi va axborot tarqatish huquqini ta’minlash borasida xalqaro hamjamiyat oldida turgan jiddiy muammolardan dalolat beradi.
YUNЕSKO o‘z bayonotida davlatlarni jurnalistlar xavfsizligini ta’minlash, ularga nisbatan sodir etilayotgan jinoyatlarni xolisona tergov qilish hamda aybdorlarni javobgarlikka tortish bo‘yicha samarali choralar ko‘rishga chaqirmoqda. Hisobotda ta’kidlanishicha, jurnalistlarning o‘limi nafaqat alohida shaxslar uchun fojia, balki butun jamiyatning haqiqatdan xabardor bo‘lish huquqiga qilingan tajovuz sifatida baholanishi lozim.
Tashkilot xalqaro institutlarni ushbu salbiy holatni bartaraf etish yo‘lida birlashishga va so‘z erkinligini himoya qilishning yangi mexanizmlarini ishlab chiqishga undamoqda.
Izohlar
0