Misrdagi mashhur Xeops piramidasi yoki Giza buyuk piramidasi atrofida yangi ilmiy bahslar boshlandi. Bu haqda Zamin.uz xabar berdi.
Tadqiqotchi Sayfi Levi tomonidan ilgari surilgan nazariyaga ko‘ra, mazkur inshootning me’moriy o‘lchamlarida Oy, yulduzlar va sayyoralar harakati bilan bog‘liq murakkab matematik tizim yashiringan bo‘lishi mumkin. Britaniya gazetalari xabariga ko‘ra, piramida konstruksiyasida qadimgi misrliklarning matematika va astronomiya sohasidagi yuksak bilimlarini tasdiqlovchi aniq sonli namunalar va qat’iy qonuniyatlar mavjud.
Muallifning fikricha, inshootning tashqi parametrlari va ichki yo‘laklarining joylashuvi tasodifiy emas, balki osmon jismlarining muayyan davrlari bilan uyg‘unlashgan. Agar ushbu faraz o‘z tasdig‘ini topsa, bu qadimgi sivilizatsiya vakillari koinotdagi hodisalarni hisoblashda zamonaviy fan tasavvur qilganidan ham ancha rivojlangan usullardan foydalanganini anglatadi.
Hozirgi kunda mutaxassislar ushbu nazariyani tahlil qilishda davom etmoqda va piramida sirlarini ochish uchun raqamli modellashtirish usullaridan foydalanilmoqda. Mazkur tadqiqot tarixiy obidaning nafaqat qabr, balki astronomik kuzatuv markazi bo‘lgani haqidagi qarashlarni yangi bosqichga olib chiqishi kutilmoqda.
Izohlar
0