Ukraina va Isroil o'rtasida don mojarosi sabab nizo yuzaga keldi

Ukraina va Isroil o'rtasida o'g'irlangan don mahsulotlari bo'yicha nizo yuzaga keldi

Yaqin Sharqdagi eng yirik dengiz bog'lamalaridan biri hisoblangan Hayfa portida Ukraina don mahsulotlari bilan bog'liq vaziyat xalqaro siyosiy ziddiyatni keltirib chiqardi. Bu haqda Zamin.uz xabar berdi.

Ukrainaga tegishli ekani aytilayotgan yuklar atrofidagi bahslar iqtisodiy doiradan chiqib, yirik geosiyosiy to'qnashuv tusini oldi. Hayfa portiga don yuklangan kemaning kirib kelishi Kiyev rasmiylarining keskin e'tiroziga sabab bo'ldi.

Ukraina tomoni ushbu mahsulotlar Rossiya tomonidan egallangan hududlardan noqonuniy olib chiqilganini ta'kidlamoqda. Tashqi ishlar vaziri Andrey Sibiga mazkur holat ikki davlat aloqalariga salbiy ta'sir ko'rsatishini bildirdi.

Prezident Zelenskiy o'g'irlangan mahsulotlar savdosi xalqaro huquq normalariga ko'ra jinoyat ekanini eslatib o'tdi. Hozirda Kiyev ushbu jarayonlarda ishtirok etayotgan kompaniyalarga nisbatan sanksiyalar tayyorlamoqda.

Ukraina razvedkasi ma'lumotlariga ko'ra, Rossiya okkupatsiya ostidagi yerlardan olingan hosilni yashirin sxemalar orqali eksport qilmoqda. Yukning manbasini yashirish uchun ochiq dengizda don bir kemadan ikkinchisiga o'tkazilmoqda.

Hisob-kitoblarga ko'ra, 2025 yil davomida shu kabi yo'llar bilan 2 mln tonnadan ortiq mahsulot chetga chiqarilgan bo'lishi mumkin. Yevropa Ittifoqi Rossiya sanksiyalarini chetlab o'tishga ko'maklashayotgan uchinchi davlatlar kompaniyalariga nisbatan cheklovlar joriy etishi haqida ogohlantirdi.

YeI vakili Anuar El-Anuni Isroil hukumatiga tegishli so'rovlar yuborilganini tasdiqladi. Isroil tomoni ayblovlarga nisbatan ehtiyotkor munosabatda bo'lmoqda.

Tashqi ishlar vaziri Gideon Saar hujjatlar yetarli emasligi sababli ayblovlarni tekshirish imkonsizligini ma'lum qildi. Shu bilan birga, Isroil siyosiy doiralarida Ukrainaning sanksiyalar bilan tahdid qilishi noshukurlik sifatida baholanmoqda.

Sobiq mulozim Voldiger Isroil urush boshidan buyon Ukrainaga erta ogohlantirish tizimlari, harbiy aslahalar va tibbiy infratuzilma bilan yordam berib kelayotganini ta'kidladi.