Saudiya Arabistoni bosh muftiyi shayx Solih bin Favzon al-Favzon mamlakat chegaralarini himoya qilayotgan harbiy xizmatchilarga muhim murojaat bilan chiqdi. Bu haqda Zamin.uz xabar berdi.
U o‘z nutqida harbiylarni husiylar tomonidan yuzaga kelayotgan xavf-xatarlarga qarshi qat’iy turishga va yuklatilgan vazifalarni sidqidildan bajarishga safarbar etdi. Muftiyning ushbu chaqirig‘i Saudiya Arabistoni hududiy yaxlitligini ta’minlashda ishtirok etayotgan barcha harbiy qismlar hamda koalitsiya kuchlari vakillariga qaratilgan.
Shayx Solih bin Favzon al-Favzon o‘z murojaatida harbiylarni birdamlikka chorlab, ular o‘rtasidagi hamjihatlik mamlakat xavfsizligining asosiy omili ekanligini ta’kidladi. Shuningdek, u jangovar postlarda turgan askarlarni sabr-toqatli, doimo hushyor va ogoh bo‘lishga chaqirdi.
Muftiyning fikricha, qo‘mondonlik tomonidan beriladigan ko‘rsatmalarga so‘zsiz rioya qilish hamda yuqori intizomni saqlash har qanday tahdidga qarshi kurashishda hal qiluvchi ahamiyat kasb etadi. Ushbu bayonot mamlakatning janubiy chegaralaridagi vaziyat murakkablashib borayotgan bir pallada harbiy xizmatchilarning ma’naviy ruhini ko‘tarish va ularni vazifani bajarishga tayyor holatda ushlab turish maqsadida qilingan.
Izohlar
0