Meksika poytaxti Mexiko shahrida fojiali voqea yuz berdi. Bu haqda Zamin.uz xabar berdi.
O‘zining nikoh to‘yi arafasida turgan 35 yoshli Dulse Mariya yashirin tarzda liposaksiya amaliyotini o‘tkazishga qaror qilgan va mazkur jarayon natijasida vafot etgan. Ma'lum bo‘lishicha, marhuma o‘zining bo‘lajak turmush o‘rtog‘iga sog‘lig‘i bilan bog‘liq muammolar, xususan, bachadon miomasini davolatish uchun shifokor ko‘rigiga borayotganini aytib, haqiqiy maqsadini sir saqlagan.
Tekshiruvlar davomida Dulse Mariya tibbiy muolaja bahonasida aslida estetik operatsiyaga kirgani aniqlandi. U mazkur klinikani ijtimoiy tarmoqlar orqali topgan bo‘lib, Pink Glow Clinic deb nomlangan muassasa bilan bog‘langan.
Joriy yilning 27 avgust kuni bo‘lib o‘tgan dastlabki maslahatlashuv jarayonidan so‘ng, ayol operatsiyaga rozi bo‘lgan. Hozirda ushbu tibbiy muassasadagi xizmatlar sifati va jarrohlik amaliyotining xavfsizlik standartlariga javob berish-bermasligi yuzasidan surishtiruv ishlari olib borilmoqda.
Ushbu hodisa estetik jarrohlik bilan bog‘liq xatarlar va klinikalar faoliyatini nazorat qilish masalasini yana bir bor dolzarb qilib qo‘ydi.
Izohlar
0