Zaida Santos Rocha o'ziga e'tibor berishni shifokorlar ko'rigidan muhimroq deb bildi
Keksa yoshda ham hayotga bo'lgan qiziqish va tashqi ko'rinishga e'tibor susaymasligini braziliyalik 91 yoshli Zaida Santos Rocha o'z misolida ko'rsatib berdi. Bu haqda Zamin.uz xabar berdi. Salomatligi yomonlashgani sababli xonadoniga tez yordam xizmatini chaqirgan ayol mutaxassislar kelganidan keyin ham ko'rikka chiqishga shoshilmadi. Ma'lum bo'lishicha, Rocha shifokorlar huzuriga chiqishdan avval oynaga qarab, o'zini tartibga keltirishni ma'qul ko'rgan.
Xususan, u sun'iy kipriklarini taqib, pardozini yakunlaganidan keyingina tibbiyot xodimlarini qabul qilgan. Ayolning nevarasi ta'kidlashicha, uning buvisi har qanday vaziyatda, hatto betobligida ham chiroyli va tartibli ko'rinishni o'zining hayotiy tamoyili deb biladi.
Mazkur voqea ijtimoiy tarmoqlar foydalanuvchilari o'rtasida keng muhokama qilindi. Ko'pchilik keksa ayolning o'ziga bo'lgan hurmati va estetik didini yuqori baholadi.
Mutaxassislar fikricha, insonning tashqi ko'rinishiga e'tibor qaratishi va hayotga ijobiy munosabati uning ruhiy barqarorligini ta'minlashda muhim ahamiyatga ega. 91 yoshli ayolning ushbu harakati ko'plab insonlar uchun o'ziga xos motivatsiya namunasiga aylandi.
