Jahongir O‘rozov faoliyatini Germaniya chempionatida davom ettirishi mumkin

Samarqandning Dinamo futbol klubi o‘z tarkibidagi himoyachi Jahongir O‘rozovni transfer qilish bo‘yicha kelib tushadigan takliflarni muhokama qilishga shay ekanligini ma’lum qildi. Bu haqda Zamin.uz xabar berdi.

Klub rahbariyati ushbu qarorini Eurasia Football nashriga bergan rasmiy bayonotida tasdiqladi. O‘zbekiston milliy terma jamoasi a’zosi hisoblangan 22 yoshli markaziy himoyachiga nisbatan xalqaro maydonda qiziqishlar ortib bormoqda.

Xususan, Yevropaning nufuzli klublari futbolchini o‘z safiga qo‘shib olish niyatida ekanligi haqida xabarlar tarqalgan. Manbalarga ko‘ra, futbolchining shartnomasida belgilangan tovon puli 1 million dollarni tashkil etadi.

Hozirgi kunda nemis klublaridan biri ushbu o‘yinchi uchun jiddiy da’vogar sifatida tilga olinmoqda. Dinamo klubi mutasaddilari kelgusida muzokaralar uchun ochiq ekanliklarini bildirib, har qanday rasmiy taklif belgilangan tartibda ko‘rib chiqilishini ta’kidlashdi.

Futbolchining kelajagi va transferi bilan bog‘liq vaziyat yaqin kunlarda yanada oydinlashishi kutilmoqda.