Bosniya va Gersegovina terma jamoasi himoyachisi Tarik Muharemovich faoliyatini Angliya Premer-ligasida davom ettirishi mumkin. Bu haqda Euro-football.ru xabar berdi.
"Sportsport.ba" nashrining xabar berishicha, Angliyaning "Bornmut" klubi 23 yoshli futbolchini o‘z safiga qo‘shib olish uchun 35 million yevro taklif qilishga tayyor turibdi. Ayni damda futbolchi tegishli bo‘lgan "Sassuolo" rahbariyati ushbu taklifni ko‘rib chiqishga tayyor, biroq klub mutasaddilari transfer summasini yanada oshirish maqsadida boshqa jamoalarning ham qiziqishini kutmoqda.
Müzokaralardagi muhim jihatlardan biri shundaki, o‘yinchi huquqlarining bir qismi "Yuventus"ga tegishli. Turinliklar kelishuvdan tushadigan mablag‘ning qariyb yarmini qo‘lga kiritishlari kerak.
Shu sababli, "Sassuolo" tomoni bitimni imkon qadar foydaliroq shartlarda yakunlashdan manfaatdor. Agar mazkur transfer amalga oshsa, u "Bornmut" klubi tarixidagi eng qimmatbaho xaridlardan biriga aylanishi kutilmoqda.
Hozircha tomonlar o‘rtasidagi muzokaralar davom etmoqda va yaqin kunlarda vaziyatga oydinlik kiritilishi kutilmoqda. Muharemovichning o‘zi ham kuchliroq chempionatda o‘zini sinab ko‘rishga qarshi emasligi ta’kidlanmoqda.
