«Latsio» bosh murabbiyi Jennaro Gattuzo yarim himoyachi Davide Frattezining jismoniy holati va uning jamoa o‘yinidagi ahamiyati haqida o‘z fikrlari bilan o‘rtoqlashdi. Bu haqda Euro-football.ru xabar berdi.
Ayni damda futbolchi jarohatidan tiklanish jarayonini o‘tamoqda. Lazio Style Channel nashriga bergan intervyusida murabbiy shunday dedi: «Dushanba kuni Nunu Tavaresh, Zakkani va Frattezi tibbiy ko‘rikdan o‘tishadi.
Jarohatlar qanchalik jiddiy ekanligini aniqlash uchun tekshiruv natijalarini kutishimiz kerak». Gattuzo shogirdining mahoratiga alohida to‘xtalib o‘tdi: «Men Davide bilan tez-tez muloqot qilaman, ba'zida bahslashib ham qolamiz.
U raqib jarima maydonchasiga kirib borish qobiliyati bo‘yicha dunyoning eng yaxshi futbolchilaridan biriga aylanishi mumkin. O‘z vaqtida futbolchi sifatida maydonda to‘pni olib qo‘ygan har bir vaziyatimni men golga tenglashtirardim, chunki yonimda to‘p bilan yaxshiroq muomala qiladigan sheriklarim borligini bilardim».
Murabbiyning fikricha, Frattezi jamoa tizimida muhim o‘rin tutadi. Uning raqib himoya chizig‘ini yorib o‘tishdagi mahorati jamoaga katta ustunlik beradi.
Gattuzo futbolchining kutilmaganda raqib darvozasi oldida paydo bo‘lishi tasodif emasligini va aynan shu xislati evaziga u ko‘plab gollar urayotganini ta’kidladi. «Biz tortishamiz, ammo bir-birimizni hurmat qilamiz», – deya qo‘shimcha qildi mutaxassis.
Joriy mavsumda Frattezi Italiya A Seriyasida to‘rt marotaba raqiblar darvozasini ishg‘ol qilishga erishdi. Shuningdek, u Italiya terma jamoasining Fransiyaga qarshi kechgan bahsida ham o‘z hisobiga gol yozdirib qo‘ygan edi.
Izohlar
0