G‘azo sektorining janubiy qismida joylashgan Xon Yunis shahrida 10 oylik falastinlik chaqaloq Kenan al-Raqiq o‘ta sovuq ob-havo sharoiti tufayli vafot etdi. Bu haqda Zamin.uz xabar berdi.
Ushbu fojiali hodisa oila vaqtinchalik boshpana sifatida foydalanib kelayotgan chodirda yuz berdi. Marhum chaqaloqning otasi Ahmad al-Raqiqning ma’lum qilishicha, tongda uyg‘ongan chog‘ida farzandining ahvoli keskin yomonlashganini payqagan.
Ota bolaning terisi ko‘karib ketganini ko‘rgach, uni zudlik bilan hududdagi Nosir shifoxonasiga yetkazishga harakat qilgan. Biroq, shifokorlar ko‘rsatgan barcha tibbiy muolajalarga qaramay, go‘dakni saqlab qolishning imkoni bo‘lmadi.
Hududdagi murakkab gumanitar vaziyat va qishning qahraton sovuqlari chodirlarda yashovchi aholi, ayniqsa, yosh bolalar uchun o‘ta xavfli tus olmoqda. Elektr energiyasi, isitish tizimlari va zaruriy vositalarning yetishmasligi oqibatida yuzaga kelayotgan bunday noxush holatlar mintaqadagi insonparvarlik inqirozini yanada chuqurlashtirmoqda.
Mutaxassislar hududda boshpana topgan minglab oilalar uchun sharoitlar o‘ta og‘ir ekanligini qayd etishmoqda.
Izohlar
0