Germaniya Bundesligasining navbatdagi turida muddatidan oldin chempionlikni qo'lga kiritgan Myunxenning «Bavariya» jamoasi mehmonda «Mayns» bilan bahs olib bordi. Bu haqda Euro-football.ru xabar berdi.
Chempionlar ligasi doirasidagi PSJga qarshi bo'lajak muhim o'yinni inobatga olgan holda, bosh murabbiy Vensan Kompani tarkibda qisman rotatsiyani amalga oshirdi. Uchrashuvning birinchi bo'limi myunxenliklar uchun muvaffaqiyatsiz boshlandi.
Mezbonlar tanaffusga qadar raqib darvozasini uch bor ishg'ol qilib, yirik hisobda oldinga chiqib olishdi. 15-daqiqada Dominik Kor hisobni ochgan bo'lsa, keyinchalik Paul Nebel va Sheraldo Beker darvozabon Urbig qaytargan to'plarni muvaffaqiyatli ravishda darvozaga yo'llab, hisobni 3:0 ko'rinishiga keltirishdi.
Ikkinchi bo'limda Kompani o'yinga Harri Keyn va Maykl Olisni tushirib, hujumni kuchaytirdi. 53-daqiqada Nikolas Jekson hisobni qisqartirishga muvaffaq bo'ldi.
73-daqiqada Olise o'ng qanotdan markazga surilib, raqib darvozasining yuqori burchagiga aniq zarba yo'lladi va oradagi farqni minimal darajaga tushirdi. 80-daqiqada Jamol Mussiala yaqin masofadan hisobni tenglashtirgan bo'lsa, oradan uch daqiqa o'tib Harri Keyn g'alaba golini kiritdi — 3:4.
Shunday qilib, turnir jadvalidagi motivatsiya yo'qligiga qaramay, «Bavariya» yirik hisobdagi mag'lubiyatni irodali g'alabaga aylantira oldi. «Mayns» esa mag'lubiyatdan so'ng chempionat jadvalining o'rta qismida qolmoqda.
