Mikel Arteta "Arsenal" futbolchilarining jarohati borasida ma'lumot berdi Londonning "Arsenal" jamoasi bosh murabbiyi Mikel Arteta Angliya Premyer ligasining 34-turidan o'rin olgan "Nyukasl"ga qarshi uchrashuvdagi majburiy almashtirishlar haqida to'xtalib o'tdi. Bu haqda Euro-football.ru xabar berdi.
Mazkur bahsda "kanonirlar" 1:0 hisobida g'alaba qozongan bo'lsa-da, jamoaning ikki nafar asosiy o'yinchisi — Kay Xaverts va Eberechi Eze maydonni muddatidan avval tark etishga majbur bo'ldi. Xususan, germaniyalik hujumchi Kay Xaverts o'yinning 35-daqiqasida Viktor Dyokereshga almashtirildi.
Maydonni tark etayotgan futbolchining kayfiyati tushkun ekani kuzatildi. Ma'lumot uchun, Xaverts o'tgan yili tizzasidan jiddiy jarohat olgan edi.
Shuningdek, uchrashuvning 54-daqiqasida Eberechi Eze ham o'zida noqulaylik sezgani sababli zaxiraga olindi. Mikel Arteta: «Bu mushaklardagi og'riq, jarohatlar unchalik jiddiy emas deb o'ylaymiz.
Ularning chorshanba kungi o'yinga tayyor bo'lish-bo'lmasligini vaqt ko'rsatadi», — deya murabbiyning so'zlaridan iqtibos keltirdi "The Athletic" nashri. Eslatib o'tamiz, "Arsenal" jamoasini kelasi haftada Chempionlar ligasi yarim finali doirasida Madridning "Atletiko" klubiga qarshi muhim bahs kutmoqda.
