Abduqodir Husanov CIES reytingida yoshlar o'rtasida top futbolchilarga kirdi

Futbol olamida 23 yoshgacha bo'lgan futbolchilar klublar uchun muhim ahamiyat kasb etmoqda. Futbol tahliliga ixtisoslashgan CIES Football Observatory ushbu yosh toifasidagi futbolchilarni muntazam ravishda o'rganib, ularning o'yin sifatini baholaydi. So'nggi tahlil natijalariga ko'ra, 67 ta ligadan iborat ro'yxat tuzilib, unda 23 yoshgacha bo'lgan eng samarali futbolchilar saralab olingan.

Ushbu reytingni tuzishda futbolchilarning so'nggi olti oydagi o'yindagi barqarorligi, ta'siri va individual statistikasi asosiy mezonlar bo'lib xizmat qilgan. Ro'yxatda O'zbekiston milliy terma jamoasi va "Manchester Siti" klubi himoyachisi Abduqodir Husanov ham joy olgan. 22 yoshli futbolchi 79,9 ball to'plab, 19-o'rinni egalladi.

Mutaxassislar Husanovning kam o'yin vaqtiga qaramay, hujumlarni tashkil etish va to'p bilan chiqishda ko'rsatayotgan ishonchli o'yinini alohida e'tirof etishmoqda. Bu uning o'zini isbotlash uchun har daqiqani to'liq ishga solishiga imkon berayotir. Angliya Premer-ligasidagi reytingda birinchi o'rinni 93,8 ball bilan "Liverpul" futbolchisi Florian Virtts egalladi.

Reytingda shuningdek, Rayan Sherki ("Manchester Siti") va Lyuis Xoll ("Nyukasl Yunayted") ham yuqori pog'onalarda joylashgan. Joriy mavsumda Abduqodir Husanov "Manchester Siti" safida Angliya Liga kubogini qo'lga kiritdi. Hozirda jamoa Premer-liga va mamlakat kubogida ham chempionlik uchun kurash olib bormoqda.