Manchester derbisida chempionlik taqdiri hal bo'ladi

Angliya Premer-ligasining chempionlik poygasida hal qiluvchi o'yin bugun bo'lib o'tadi. «Manchester Siti» va «Arsenal» jamoalari Manchesterdagi «Etihad» stadionida o'zaro bahs olib boradilar. Ushbu uchrashuv mavsum taqdirini belgilashi mumkin.

Hozirgi vaqtda «Arsenal» 70 ochko bilan turnir jadvalida peshqadamlik qilmoqda. «Manchester Siti» esa 64 ochkoga ega bo'lib, qo'lda bir o'yin qoldirgan. Bugungi bahsda g'alaba qozonish va qoldirilgan o'yindagi ochkolarni qo'shib olish ularga yetakchilikni qo'lga kiritish imkoniyatini beradi.

«Manchester Siti» jamoasi so'nggi vaqtda ajoyib formada o'ynamoqda. Ular Liga kubogi finalida «Arsenal»ni 2:0 hisobida mag'lub etishgan, Angliya kubogida «Liverpul»ni 4:0 bilan yengishgan va so'nggi turda «Chelsi»ni 3:0 hisobida mag'lub etishgan. «Arsenal» uchun aprel oyi omadsiz o'tmoqda, chunki ular Angliya kubogidan «Sauthempton»ga (1:2) yutqazishgan va APLning so'nggi turida «Bornmut»ga 1:2 hisobida mag'lub bo'lishgan.

«Goal» nashrining xabar berishicha, «Manchester Siti» bosh murabbiyi Pep Gvardiola bugungi o'yinda o'zbekistonlik himoyachi Abduqodir Husanovga asosiy tarkibda maydonga tushish imkoniyatini berishi mumkin. Bu o'zbek futbol muxlislari uchun uchrashuvga bo'lgan qiziqishni oshiradi. «Manchester Siti» o'z maydonida «Arsenal»ga qarshi so'nggi 10 ta o'yinda mag'lubiyatga uchramagan (7 g'alaba, 3 durang), ammo so'nggi 5 ta APL bahsida «Arsenal» imkoniyatni boy bermagan (2 g'alaba, 3 durang).

Statistik ma'lumotlarga ko'ra, aprel oyida Pep Gvardiola jamoalari o'rtacha 2,51 ochko to'playdi, Mikel Arteta jamoalari esa 1,54 ochko bilan yetinadi. «Manchester Siti» o'z uyida oxirgi 14 ta o'yindan beri mag'lubiyatga uchramagan. Uchrashuv Toshkent vaqti bilan soat 20:30 da boshlanadi.