Humo kartalari uchun SMS-xabarnoma xizmati narxi ikki baravarga oshiriladi
O'zbekistonda 2024 yil 1-maydan boshlab Humo to'lov tizimi kartalariga xizmat ko'rsatuvchi SMS-xabarnoma tariflari qimmatlashadi. Bu haqda Zamin.uz xabar berdi. Octotelecom kontent-provayderi taqdim etgan ma'lumotlarga ko'ra, 13131 qisqa raqami orqali yuboriladigan har bir xabar narxi amaldagi 84,2 so'mdan 168,4 so'mga ko'tariladi. Mazkur o'zgarish bo'yicha "Mobiuz", "Ucell" va "Beeline" kabi yirik mobil aloqa operatorlari o'z abonentlarini rasman ogohlantirdi.
Kompaniya vakillari narxlar oshishini texnik infratuzilmani saqlash, dasturiy ta'minotni rivojlantirish hamda xizmat xavfsizligini ta'minlash bilan bog'liq xarajatlarning ortgani bilan izohladi. Shuningdek, tariflar o'zgarishiga energiya resurslari va litsenziya to'lovlari qiymatining ko'tarilgani ham ta'sir ko'rsatgan.
Xizmatdan foydalanishni to'xtatmoqchi bo'lgan mijozlar 13131 raqamiga "STOP" so'zini yuborishlari mumkin. Shu bilan birga, "Click" to'lov tashkilotining "SMS-axborot 880" xizmati narxi ham kelasi oydan boshlab 168,4 so'm etib belgilanadi.
Avvalroq "Uzcard" to'lov tizimi uchun ham xuddi shunday miqdordagi tariflar joriy etilgan edi. Humo tizimidagi bir martalik OTP-kodlar ham aynan 13131 raqami orqali yetkaziladi va xabar uchun to'lov foydalanuvchi balansidan yechib olinadi.
