O‘zbekiston Qahramoni va taniqli adabiyotshunos Ibrohim G‘ofurov vafot etdi

O‘zbekiston adabiyoti og‘ir judolikka uchradi. Bu haqda Zamin.uz xabar berdi.

Taniqli yozuvchi, mohir tarjimon va jamoat arbobi Ibrohim G‘ofurov 88 yoshida olamdan o‘tdi. Bu haqda O‘zbekiston Yozuvchilar uyushmasi rasmiy axborot berdi.

Marhum 1937 yil 27 dekabrda Toshkent shahrida dunyoga kelgan. Ibrohim G‘ofurov o‘zining sermahsul ijodiy faoliyati davomida o‘zbek adabiyotshunosligi, adabiy tanqid va badiiy tarjima yo‘nalishlarida samarali mehnat qilib, milliy madaniyatimiz hamda adabiyotimiz rivojiga ulkan hissa qo‘shgan shaxslardan biri edi.

Uning qalamiga mansub asarlar va jahon adabiyotidan o‘girilgan tarjimalar o‘quvchilar tomonidan doimo yuqori baholangan. Yozuvchining o‘zbek ziyolilari orasidagi o‘rni va qoldirgan boy ijodiy merosi kelgusi avlodlar uchun hamisha namuna bo‘lib qoladi.

Ibrohim G‘ofurov turli yillarda mamlakatimiz ijtimoiy-madaniy hayotida faol ishtirok etib, ko‘plab yosh ijodkorlarga ustozlik qilgan. Uning vafoti adabiyot jamoatchiligi uchun chuqur qayg‘u hissini uyg‘otdi.

Marhumning xotirasi yaqinlari, shogirdlari va barcha kitobxonlar qalbida mangu saqlanib qoladi.