Bir vaqtlar fitnes nashrlari muqovalaridan tushmagan va muvaffaqiyatli karyeraga ega bo‘lgan Loni Uillson bugungi kunda Los Anjeles ko‘chalarida og‘ir hayot kechirmoqda. Bu haqda Zamin.uz xabar berdi.
Hozirda 39 yoshni qarshilagan sobiq modelning butun dunyo-mulki faqat kiyim-kechak solingan birgina xaltadan iborat. U o‘zining kunlik ehtiyojlarini qondirish uchun ba’zan chiqindi qutilaridan oziq-ovqat izlashga majbur bo‘lmoqda.
O‘tmishda Loni Uillson Glam Fit, Flavour Magazine hamda Iron Man Magazine kabi nufuzli jurnallarning sahifalarida tez-tez ko‘rinish berib, fitnes olamida o‘z o‘rniga ega bo‘lgan istiqbolli model sifatida tanilgan edi. Uning professional faoliyati jadal rivojlanib, mashhurlik cho‘qqisiga chiqib borayotgan davrlarda u hatto mashhur Malibu qutqaruvchilari serialidagi Hob rolini ijro etgan aktyor Jeremi Jekson bilan turmush qurgan edi.
Biroq, hayotdagi kutilmagan burilishlar va shaxsiy muammolar sababli sobiq yulduz bugun ijtimoiy himoyasiz va uy-joysiz holatga kelib qoldi. Uning bugungi ayanchli ahvoli jamoatchilik va ommaviy axborot vositalari uchun hamon muhokama qilinayotgan mavzulardan biri bo‘lib qolmoqda.
Izohlar
0