Yuqori Chirchiq tumanida maktab direktori o'quvchi qizga shaxvoniy shilqimlik qilgani uchun jazolandi
Toshkent viloyatining Yuqori Chirchiq tumanida maktab rahbari ishtirokidagi huquqbuzarlik fosh etildi. Bu haqda Zamin.uz xabar berdi. 1987 yilda tug'ilgan ta'lim muassasasi direktori J.I. voyaga yetmagan o'quvchi qizga ijtimoiy tarmoqlar orqali odob-axloq qoidalariga zid xabarlar yuborgani aniqlandi.
Mazkur holat yuzasidan sud qarori e'lon qilindi. Sud hujjatlariga ko'ra, maktab rahbari 16-17 aprel kunlari Telegram messenjeri orqali o'quvchi qizga nomaqbul mazmundagi shaxsiy xabarlar yo'llagan.
Mazkur harakatlar yuzasidan to'plangan materiallar jinoyat ishlari bo'yicha Yuqori Chirchiq tuman sudida 22 aprel kuni ko'rib chiqildi. Sud majlisida ayblanuvchi o'z qilmishini tan olib, ushbu yozishmalarni go'yoki "tarbiyaviy maqsadlarda" amalga oshirganini da'vo qildi va jazoni yengillatishni so'radi.
Jabrlanuvchining onasi esa sud jarayonida bunday shaxsning maktabda ishlashi pedagogik etika qoidalariga mutlaqo zid ekanini ta'kidlab, qat'iy jazo tayinlanishini talab qildi. Sud raisi J.I.ni Ma'muriy javobgarlik to'g'risidagi kodeksning 41-1-moddasida (shaxvoniy shilqimlik) nazarda tutilgan huquqbuzarlikni sodir etganlikda aybdor deb topdi.
Yakuniy qarorga ko'ra, sobiq maktab rahbariga nisbatan 5 sutka ma'muriy qamoq jazosi tayinlandi. Ushbu voqea ta'lim tizimidagi rahbar kadrlar mas'uliyati va maktablardagi ma'naviy muhit barqarorligini ta'minlash masalasini yana bir bor dolzarblashtirdi.
Mutaxassislar pedagogik jamoalarda nazoratni kuchaytirish zarurligini ta'kidlamoqda.
