Xiaomi kompaniyasi aqlli tish cho'tkasini taqdim etdi
Xiaomi kompaniyasi "Youpin" platformasida "Mijia Multi-directional Sweeping Electric Toothbrush Pro" deb nomlangan yangi aqlli tish cho'tkasini namoyish qildi. Bu haqda Zamin.uz xabar berdi. Ixbt.com nashrining yozishicha, mazkur qurilma 80 dollar narxda savdoga chiqarildi. Qurilmaning texnik imkoniyatlari va konstruksiyasi zamonaviy gigiyena vositalari orasida o'ziga xosligi bilan ajralib turadi.
Qurilmaga o'rnatilgan ko'p vektorli vibratsion motor va ikki darajali erkinlikka ega maxsus tizim uning asosiy texnik xususiyati hisoblanadi. Mazkur texnologiya qarshilik yuzaga kelgan vaqtda quvvatni avtomatik ravishda muvozanatlashtiradi.
Bu esa tish milklarini turli jarohatlardan himoya qilishga xizmat qiladi. Shuningdek, cho'tkaga olti koordinatali datchik o'rnatilgan bo'lib, u cho'tka uchining holati va qiyaligini aniq nazorat qiladi.
Mazkur datchik yordamida og'iz bo'shlig'idagi yetib borish qiyin bo'lgan nuqtalarni samarali tozalash mumkin bo'ladi. Tish cho'tkasining tashqi korpusi yumshoq rezina qobiq bilan qoplangan bo'lib, foydalanishda qo'shimcha qulaylik yaratadi.
To'plam tarkibida foydalanuvchilar ehtiyojidan kelib chiqib, kundalik tozalash, nozik parvarish hamda oqartirish funksiyasini bajaruvchi turli xil nasadkalar mavjud. Qurilmani maxsus mobil ilova orqali boshqarish imkoniyati yaratilgan.
Ilova yordamida ish rejimlarini masofadan tanlash va ularni bir marta bosish orqali almashtirish yo'lga qo'yilgan.
