UCLA olimlari o‘zga sayyoraliklar izlagan o‘n yillik tadqiqot yakunlandi

Los-Anjelesdagi Kaliforniya universiteti (UCLA) mutaxassislari oʻzga sayyoralik sivilizatsiyalar izlarini qidirishga qaratilgan oʻn yillik ilmiy dastur yakunlari boʻyicha hisobot taqdim etdi. Bu haqda Zamin.uz xabar berdi.

Tadqiqot ishlari 100 metrli Green Bank radioteleskopi yordamida 1,15 dan 1,73 GGs chastota oraligʻida amalga oshirilgan. Kuzatuv jarayonida 70 mingdan ortiq yulduz tizimlari oʻrganilib, 105,7 millionga yaqin potensial nomzod signallar qayd etildi.

Ixbt.com nashrining yozishicha, batafsil tahlillar natijasida ushbu signallarning birortasi ham oʻzga sayyoraliklar bilan bogʻliq deb topilmadi. Barcha qayd etilgan holatlar sun’iy yoʻldosh aloqasi hamda boshqa antropogen omillar sababli yuzaga kelgan yerga tegishli radioxalaqitlar ekanligi aniqlandi.

Olimlar mazkur natijalarni muvaffaqiyatsizlik deb emas, balki qidiruv tizimining samaradorligini koʻrsatuvchi muhim ilmiy yutuq sifatida baholashmoqda. Tizimning aniqligini sinash maqsadida kiritilgan sun’iy test signallari algoritmlar tomonidan 94 foizdan 98,7 foizgacha aniqlikda aniqlangan.

Ma’lumotlarni qayta ishlashda ResNet turkumiga kiruvchi konvolyutsion neyron tarmoqlari va mashinali oʻrganish usullari keng qoʻllanilgan. Shuningdek, Zooniverse platformasi koʻngillilari ma’lumotlar bazasini tayyorlashda salmoqli hissa qoʻshishdi.

Tadqiqotchilar Dopler chastota siljishi kabi murakkab effektlarni ham hisobga olgan holda, galaktikamizning yaqin hududlarida kuchli radiouzatgichlar mavjudligi ehtimoli juda pastligini ta’kidlashdi. Hisob-kitoblarga koʻra, 16 mingta yulduz tizimidan bittasidan kamrogʻi 20 ming yorugʻlik yili masofasigacha kuchli signal yuborishi mumkin.

Loyiha mualliflari SETI kabi muhim tadqiqotlar uchun davlat moliyalashtirishi yetarli emasligiga e’tibor qaratib, xususiy jamgʻarmalarning rolini alohida qayd etishdi.