Toyota talabni qondirish uchun ilk bor Tayvandan avtomobil import qiladi

Toyota avtokonserni o'z tarixida ilk bor Yaponiya ichki bozori uchun mo'ljallangan strategik muhim modellar ishlab chiqarishni xorijga ko'chirishga qaror qildi. Bu haqda Zamin.uz xabar berdi.

Ixbt.com nashrining xabar berishicha, kompaniya Tayvanda maxsus ishlab chiqarish liniyasini tashkil etib, joriy yilning oktyabr oyidan boshlab tayyor mahsulotlarni Yaponiyaga eksport qilishni yo'lga qo'yadi. Ushbu loyiha doirasida Tayvanda brendning eng xaridorgir modellaridan sanalgan Noah va Voxy minivenlari yig'iladi.

Mazkur avtomobillarning har biri Yaponiya bozorida yiliga 70 000 dan 80 000 donagacha sotilsa-da, hozirda ularga bo'lgan talab taklifdan sezilarli darajada yuqori. Hatto ayrim hollarda mijozlar o'z buyurtmalarini bir yildan ortiq kutishiga yoki xaridning bekor qilinishiga to'g'ri kelmoqda.

Vaziyatni o'nglash maqsadida Toyota rahbariyati Tayvanning shimoliy hududidagi qo'shma korxonaga investitsiya kiritib, mavjud quvvatlarni modernizatsiya qilishni rejalashtirgan. Bu yerda yiliga 100 000 dona avtomobil ishlab chiqarish ko'zda tutilgan bo'lib, bu ko'rsatkich Noah va Voxy modellarining ichki bozordagi umumiy savdo hajmining qariyb 70 foizini qoplaydi.

Ta'kidlash joizki, Yaponiyadagi mahalliy zavodlar ham o'z faoliyatini to'liq quvvatda davom ettiradi. Kompaniya prezidenti yetkazib berishdagi kechikishlarni inqirozli holat deb baholab, uzoq kutilish muddati iste'molchilarning raqobatchilarga o'tib ketishiga sabab bo'lishidan xavotir bildirgan.

Bugungi kunda Toyota Yaponiya yengil avtomobillar bozorining 50 foizdan ortiq ulushiga egalik qiladi va 2025-yilga qadar mamlakat ichida jami 3,27 million dona transport vositasi ishlab chiqarishni maqsad qilgan. Avvalroq Honda kompaniyasi ham xorijda tayyorlangan elektromobillarni Yaponiyaga qayta import qilish amaliyotini boshlagan edi.

Toyota ushbu yangi strategiya orqali ichki bozordagi sun'iy taqchillikni bartaraf etishni rejalashtirmoqda.