Toshkentdagi bog‘chada bolalarga nisbatan zo‘ravonlik holati o‘rganilmoqda

Toshkent shahridagi Rayyona Kids xususiy maktabgacha ta'lim muassasasida tarbiyachining bolalarga nisbatan shafqatsiz munosabatda bo‘lgani aks etgan videolavhalar ijtimoiy tarmoqlarda keng tarqaldi va jamoatchilikning haqli e'tirozlariga sabab bo‘ldi. Bu haqda Zamin.uz xabar berdi.

Tarqalgan kadrlarda muassasa xodimi voyaga yetmagan bolalardan birining og‘ziga majburan mato tiqayotgani, boshqa bir holatda esa bolaning qo‘lini eshik orasiga qisib, unga jismoniy og‘riq yetkazayotgani yaqqol ko‘rinib turibdi. Mazkur holat nafaqat ota-onalar, balki keng jamoatchilik orasida keskin muhokama va noroziliklarni keltirib chiqardi.

Vaziyat yuzasidan Maktabgacha va maktab ta’limi vazirligi rasmiy munosabat bildirib, voqeani nazoratga olganini ma'lum qildi. Hozirgi vaqtda tegishli mutaxassislar va huquqni muhofaza qiluvchi organlar tomonidan ushbu xatti-harakatlarning tafsilotlari o‘rganilmoqda hamda qonuniy baho berish choralari ko‘rilmoqda.

Ta'lim muassasalarida bolalarning xavfsizligini ta'minlash va ularga nisbatan zo‘ravonlik holatlarining oldini olish masalasi vazirlikning doimiy nazoratida ekanligi ta'kidlandi. Tergov jarayoni yakunlari bo‘yicha qo‘shimcha ma'lumotlar jamoatchilikka yetkazilishi kutilmoqda.