Islom Karimov nomidagi Toshkent xalqaro aeroportida bojxona xizmati xodimlari tomonidan qimmatbaho elektron qurilmalarning mamlakat hududiga noqonuniy olib kirilishiga doir holat fosh etildi. Bu haqda Zamin.uz xabar berdi.
«Toshkent-AERO» ixtisoslashtirilgan chegara bojxona posti xodimlari Dubay shahridan uchib kelgan uch nafar fuqaroning yuklarini belgilangan tartibda ko‘zdan kechirishdi. Tekshiruv jarayonida yo‘lovchilar bojxona nazoratidan o‘tish vaqtida o‘zlaridagi qimmatbaho smartfonlarni yashirgani ma’lum bo‘ldi.
Ushbu shaxslar og‘zaki so‘rov davomida o‘zlari bilan olib kelayotgan tovarlar haqida ma’lumot bermagan, shuningdek, yo‘lovchi bojxona deklaratsiyasida mazkur gadjetlarni ko‘rsatishdan bosh tortishgan. Hozirgi vaqtda ushbu holat yuzasidan bojxona organlari tomonidan surishtiruv ishlari olib borilmoqda.
Natijalarga ko‘ra, qonunbuzarlarga nisbatan tegishli tartibda chora ko‘riladi. Davlat bojxona qo‘mitasi vakillari fuqarolarni mamlakatga tovarlarni olib kirishda amaldagi qonunchilik talablariga qat’iy rioya qilishga hamda barcha qimmatbaho buyumlarni deklaratsiyalashga chaqirib qoladi.
Mazkur nazorat tadbirlari kontrabanda va bojxona qoidalarini buzish holatlarining oldini olishga qaratilgani bilan ahamiyatlidir.
Izohlar
0