Steam platformasida kriptovalyuta o‘g‘irlagan shaxs qo‘lga olindi

AQSH Federal qidiruv byurosi (FBI) agentlari Florida shtatida istiqomat qiluvchi 21 yoshli Zyaire Wilkinsni qo‘lga oldi. Bu haqda Zamin.uz xabar berdi.

Unga Steam platformasi orqali tarqatilgan zararli dasturlar yordamida foydalanuvchilarning kriptovalyuta hamyonlarini o‘g‘irlash ayblovi qo‘yilgan. Tergov xulosalariga ko‘ra, gumonlanuvchi mazkur o‘yin maydonchasiga maxsus kodlar bilan boyitilgan, soxta videoo‘yinlarni kiritish orqali kiberjinoyatlarni sodir etib kelgan.

Mazkur sxema minglab o‘yinchilarning nafaqat shaxsiy ma’lumotlari, balki ularning raqamli aktivlari va mablag‘lariga jiddiy xavf tug‘dirgan. Mutaxassislarning qayd etishicha, jinoyatchi foydalanuvchilarni aldash yo‘li bilan ularning hamyonlariga noqonuniy kirish huquqini qo‘lga kiritgan.

Hozirda huquq-tartibot idoralari ushbu holat yuzasidan surishtiruv ishlarini davom ettirmoqda. Ushbu voqea yirik o‘yin platformalarida xavfsizlik choralarini kuchaytirish zarurati borligini yana bir bor ko‘rsatdi.

Hodisa haqidagi dastlabki ma’lumotlar Techcrunch.com nashri tomonidan e’lon qilindi. Tergov jarayoni yakunlangach, sud tomonidan tegishli qaror qabul qilinishi kutilmoqda.