Rossiyada murakkab sharoitda qolgan yetti nafar o'zbekistonlik bola vatanga qaytarildi
Rossiya hududida qiyin vaziyatga tushib qolgan yetti nafar voyaga yetmagan bola O'zbekistonga olib kelindi. Bu haqda Zamin.uz xabar berdi. Bu haqda Migratsiya agentligi axborot xizmati xabar berdi. Aniqlanishicha, Novosibirsk shahrida ikki nafar o'zbekistonlik ayol o'z farzandlari bilan og'ir ijtimoiy sharoitda yashab kelgan.
Ayollardan birining besh nafar, ikkinchisining esa ikki nafar voyaga yetmagan farzandi bo'lib, bolalarning hech birida shaxsni tasdiqlovchi hujjatlar bo'lmagan. Mazkur holat yuzasidan Migratsiya agentligining Rossiyadagi vakolatxonasi hamda O'zbekiston Bosh konsulxonasi hamkorlikda tezkor choralar ko'rdi.
Mutasaddilar tomonidan bolalarga vatanga qaytish uchun zarur bo'lgan guvohnomalar rasmiylashtirildi va barcha huquqiy masalalar hal etildi. Shundan so'ng, bolalar uchun aviachiptalar xarid qilinib, ular maxsus kuzatuv ostida O'zbekistonga yetkazib kelindi.
Ushbu tadbir insonparvarlik tamoyillari asosida amalga oshirilgani qayd etildi. Hozirgi vaqtda bolalarning ijtimoiy himoyasi va kelgusi taqdiri bilan bog'liq masalalar mas'ul tashkilotlar nazoratiga olingan.
