Namangan viloyatining Uchqo‘rg‘on tumanida joylashgan davlat maktabgacha ta’lim tashkilotida besh yoshli bolaga nisbatan sodir etilgan jinsiy zo‘ravonlik holati jamoatchilik orasida katta rezonans keltirib chiqardi. Bu haqda Zamin.uz xabar berdi.
Mazkur mudhish voqeadan so‘ng, Maktabgacha va maktab ta’limi vazirligi respublika miqyosida qat’iy choralar ko‘rishga kirishdi. Xususan, O‘zbekistondagi barcha davlat maktabgacha ta’lim tashkilotlari xodimlarining shaxsiy va kasbiy ma’lumotlari qayta tekshiruvdan o‘tkazilmoqda.
Vazirlik vakillarining qayd etishicha, mazkur tekshiruv jarayonlari bolalar xavfsizligini ta’minlash hamda kelgusida shunday salbiy holatlarning oldini olish maqsadida tashkil etilgan. Ayni paytda tegishli huquqni muhofaza qiluvchi organlar tomonidan mazkur jinoyat yuzasidan surishtiruv ishlari olib borilmoqda.
Mutasaddilar barcha bog‘cha xodimlarining xulq-atvori va ularning bolalar bilan ishlash jarayonidagi muvofiqligini chuqur o‘rganish vazifasini o‘z zimmasiga olgan. Ushbu jarayon davlat ta’lim muassasalarida sog‘lom va xavfsiz muhitni yaratish hamda tarbiyalanuvchilarning huquqlarini himoya qilish yo‘lida muhim qadam hisoblanadi.
Vazirlik yuz bergan holatni har tomonlama va xolis o‘rganib, aybdorlarga nisbatan qonuniy chora ko‘rilishini ta’minlashini ma’lum qilgan.
Izohlar
0