Namanganlik qutqaruvchi kanalda oqib ketayotgan 3 yoshli bolani qutqarib qoldi
Namangan viloyatida Favqulodda vaziyatlar vazirligi xodimi suvda oqib ketayotgan kichik yoshli bolaning hayotini saqlab qoldi. Bu haqda Zamin.uz xabar berdi. Voqea 26 aprel kuni Yangi Namangan tumanidagi «Mingterak» mahallasi hududidan o'tuvchi Katta Namangan kanalida yuz bergan. Ma'lum qilinishicha, 3 yoshli bola ehtiyotsizlik oqibatida suvga tushib ketgan va kuchli oqim uni olib qochgan.
Shu vaqtda Davlatobod tumani FVV bo'limi xodimi Ulug'bek Asqarov xizmat vazifasini o'tab, uyiga qaytayotgan edi. Asqarov suvda oqib borayotgan bolani ko'rib qolgan va darhol harakat qilgan.
Qutqaruvchi o'z hayotini xavf ostiga qo'yib, suvga sakragan hamda bolani qirg'oqqa olib chiqqan. Jabrlanuvchiga zudlik bilan birinchi tibbiy yordam ko'rsatildi.
Hozirda bolaning salomatligi tiklangan va ahvoli yaxshi ekani aytilmoqda. Mazkur voqea hududdagi kuzatuv kameralaridan biriga muhrlangan.
Ushbu jasorat namunasi qutqaruv xizmati xodimlarining xizmat vaqtidan tashqari paytda ham hushyor va fidoyi ekanini tasdiqladi.
